മരണാനന്തര പ്രതിഭാസങ്ങൾ 

അന്നമയ ശരീരം ഒരു കമ്പ്യൂട്ടർ വർക്ക് സ്റ്റേഷൻ പോലെ ആണ് എന്ന് പറഞ്ഞുവല്ലോ. അത് പ്രവൃത്തിപ്പിക്കുവാൻ  എനർജിയും (വൈദ്യുതിക്ക് സമം)  ഡാറ്റയും  (സോഫ്റ്റ്‌വെയറിനു സമം)  വേണം എന്നും നമ്മൾ കണ്ടു. ഏതെങ്കിലും കാരണവശാൽ കമ്പ്യൂട്ടറിൻ്റെ  ഹാർഡ്‌വെയർ നശിച്ചുപോയാൽ,   (കാലപ്പഴപ്പം കൊണ്ടോ, ഹാർഡ്‌വേറിന് ഏൽക്കുന്ന  ക്ഷതം കൊണ്ടോ) വേറെ ഒരു പുതിയ ഹാർഡ്‌വെയറിലേക്ക്  ആ ഡാറ്റകൾ മാറ്റം ചെയ്തു പ്രവർത്തനം തുടരാം. അതുപോലെ തന്നെ അന്നമയ ശരീരം കാലഹരണപ്പെട്ടാൽ അതിൽ ഉപയോഗിച്ചിരുന്ന  സോഫ്റ്റ് വെയറും മറ്റു  ഡാറ്റകളും  ഏറ്റവും അനുയോജ്യമായ പുതിയ  ഒരു അന്നമയ കോശത്തിലേക്ക് മാറ്റം ചെയ്തു  പ്രവർത്തനം അഭംഗുരം  തുടരാം. അത്ര മാത്രമേ നമ്മുടെ  അന്നമയ ശരീരത്തിൻ്റെ മരണത്തിലൂടെ സംഭവിക്കുന്നുള്ളൂ. പുതിയ ‘അനുയോജ്യമായ’ ഒരു അന്നമയ ശരീരം സൃഷ്ടിച്ച്  എടുക്കുവാൻ  പലകാരണങ്ങൾ കൊണ്ട്  പല രീതിയിലുള്ള കാല വിളംബങ്ങൾ വന്നേക്കാം എന്ന് മാത്രം.

ഹാർഡ് വെയറും സോഫ്റ്റ് വെയറും 

അന്നമയകോശം പ്രവൃത്തിക്കുന്ന രീതി ഇനി അല്പം കൂടി വിശദമായി മനസ്സിലാക്കുവാൻ ശ്രമിക്കാം. കമ്പ്യൂട്ടർ പ്രവൃത്തിപ്പിക്കുവാൻ ഇലക്ട്രിസിറ്റിയും സോഫ്റ്റ് വെയറും ആവശ്യമുള്ളത് പോലെ,   അന്നമയ കോശത്തിൻ്റെ പ്രവർത്തനത്തിനും  ഇവ രണ്ടും ആവശ്യമാണ്.  ഈ ആവശ്യത്തിലേക്കായി, ഒരു മൂലധനം എന്നപോലെ പോലെ,  ചില ഉപാധികളോടെ  മൂന്ന്  തരത്തിലുള്ള മൂലധനങ്ങൾ  ജനിക്കുമ്പോൾ തന്നെ  നമുക്ക് ലഭിക്കുന്നുണ്ട്. അത് എന്താണെന്ന് നോക്കാം. 

മൂന്ന് മൂലധങ്ങൾ 

നമ്മൾ  ഓരോരുത്തരും  ഭൂമിയിൽ ജനിക്കുന്നത് കാലം, ഓർമ്മ,  ഊർജ്ജം എന്നീ മൂന്ന് വസ്തുതകളുടെ  കൃത്യമായി അളന്ന് അനുവദിച്ചു കിട്ടുന്ന  മൂലധനവും    ആയിട്ടാണ്. ഇംഗ്ലീഷിൽ  “ടൈം”, “മെമ്മറി”, “എനർജി” എന്ന് പറഞ്ഞാൽ പെട്ടെന്ന് മനസ്സിലാകും. 

കാലം 

എത്രകാലത്തേക്ക് ഓരോ അന്നമയ കോശവും  ഭൂമിയിൽ നിലനിൽക്കണം എന്ന കൃത്യമായ ഒരു കാലയളവ് നമുക്ക് ഓരോരുത്തർക്കും ജനനത്തിലേ   നല്കപ്പെടുന്നുണ്ട്. ഇതിൽ  തന്നിരിക്കുന്ന  ‘കാല’ത്തിൻ്റെ അളവ്  വർദ്ധിപ്പിക്കുവാൻ  നമുക്ക് കഴിയില്ല എന്നതാണ് ഒരു ഉപാധി. അന്നമയ കോശം  നിലനിൽക്കുന്ന ഏറ്റവും കൂടിയ കാലയളവ്   നിശ്ചിതമാണ്,  ക്ലിപ്തമാണ്. അതിൻ്റെ നിയന്ത്രണം നമ്മുടെ കൈയിൽ അല്ല. കാലം ആണ്  നമുക്ക് ലഭിക്കുന്ന ഒന്നാമത്തെ മൂലധനം. നമ്മൾ എങ്ങിനെ ജീവിക്കുന്നു എന്നത് അനുസരിച്ച് അനുവദിച്ചു കിട്ടിയ കാലം മുഴുവനും അന്നമയ ശരീരം നിലനിൽക്കുവാനോ, നില നിൽക്കാതിരിക്കുവാനോ ഉള്ള  സാദ്ധ്യത ഉണ്ട്. തെറ്റായ ജീവിത രീതി, തീവ്രമായ ജീവിത രീതി, ആത്മഹത്യ, വധിക്കപ്പെടൽ, സ്വയം വരുത്തി വച്ച രോഗങ്ങൾ  തുടങ്ങിയവ എല്ലാം കൃത്യമായി അളന്നു ലഭിച്ച ആ കാലത്തെ കുറക്കുന്നവയാണ്. അങ്ങിനെ  തെറ്റായ ജീവിത രീതികൾ കൊണ്ട്  തന്നിരിക്കുന്ന കാലത്തെ കുറക്കുവാനോ, അല്ലെങ്കിൽ,  ശരിയായ ജീവിത രീതികൾ കൊണ്ട് തന്നിരിക്കുന്ന കാലം മുഴുവനും ഉപയോഗിക്കുവാനോ മാത്രമേ നമുക്ക് കഴിയൂ. 

ഇത് മനസ്സിലാക്കുവാൻ സമാനതാ തത്വം അനുസരിച്ചുള്ള ഒരു  ഉദാഹരണം എടുക്കാം. നമ്മൾ യൂണിവേഴ്സിറ്റിയിൽ  ഒരു കോഴ്സിന് ചേരുകയാണ് എന്ന് സങ്കൽപ്പിക്കുക  – കോഴ്സ് കാലം നിശ്ചിതമാണ് – അത് കൂട്ടുവാൻ കഴിയില്ല. എന്നാൽ തെറ്റായ രീതിയിൽ ആ പഠന കാലം ഉപയോഗിച്ചാൽ  “ഡ്രോപ്പ് ഔട്ട്” ആകാം. ശരിയായ രീതിയിൽ കോഴ്സ് കാലയളവ് പൂർണ്ണമായി ഉപയോഗിച്ചാൽ വിജയശ്രീലാളിതരായി കോഴ്സ് പൂർത്തീകരിച്ചു പുറത്തു വരാം. അതുപോലെ തന്നെ ആണ് ഇതും. ഓരോ ജീവിതാനുഭവവും കാർമ്മീക  കാരണങ്ങളാൽ എഴുതപ്പെട്ട തികച്ചും  വ്യക്തിഗതമായ  സിലബസ്സ് ആണ്. അത് മറ്റുള്ളവരുടെ പാഠങ്ങളുമായി  താരതമ്യം ചെയ്യരുത്. അവർക്ക് അവരുടെ വ്യക്തിഗത പാഠങ്ങൾ; നമുക്ക് നമ്മുടേതും. അത്ര അതുല്യമായി രൂപകൽപ്പന ചെയ്യപ്പെട്ടതാണ് നമ്മുടെ ഓരോരുത്തരുടേയും ജീവിതം.

ഓർമ്മകൾ – മെമ്മറി അഥവാ ഡാറ്റ 

ഇനി രണ്ടാമത്തെ മൂലധനം എന്താണെന്ന് നോക്കാം.  സമയത്തിൻ്റെ  കാര്യത്തിൽ എന്നപോലെ  തന്നെ  നമ്മൾ ഓരോരുത്തരും ജനിക്കുന്നതു തന്നെ “ഓർമ്മ”കളുടെ  ഒരു നിശ്ചിത അളവിൽ ഉള്ള ഒരു ഭാണ്ഡവുമായിട്ടാണ്.   “ഓർമ്മ” എന്ന് പറയുന്നത്  വിവര സാങ്കേതിക വിദ്യയിൽ പ്രതിപാദിക്കുന്നതിന് സമാനമായ  “ഡാറ്റ”, അല്ലെങ്കിൽ “മെമ്മറി” അല്ലെങ്കിൽ “ഇൻഫോർമേഷൻ” ആണ് – അല്ലാതെ നമ്മൾ ഓർത്തെടുക്കുന്ന കാര്യങ്ങൾ അല്ല ഇവിടെ “ഓർമ്മ” എന്ന വാക്കുകൊണ്ട് ഉദ്ദേശിച്ചിരിക്കുന്നത്..  പ്രധാനമായി   യോഗ ശാസ്ത്രത്തിൽ   എട്ടു തരത്തിലുള്ള ‘ഓർമ്മ’കളെ  കുറിച്ച് പറയുന്നുണ്ട്. ഈ ‘ഓർമ്മകൾ’ എല്ലാം പരസ്പരം ഇഴ ചേർന്ന്  തയ്യാറാക്കിയ ഒരു ബ്ലൂ പ്രിൻ്റ്  ആണ് നമ്മുടെ ഓരോരുത്തരുടേയും ഭൂമിയിലുള്ള ജീവിതം, ജീവിതത്തിലെ  അനുഭവങ്ങൾ, സാഹചര്യങ്ങൾ എന്നിവയൊക്കെ –  നമുക്കോരോരുത്തർക്കും  ജനനത്തോടെ ലഭിക്കുന്ന   ഈ ഓർമ്മകളുടെ ശേഖരത്തെ    ഒറ്റവാക്കിൽ “കർമ്മം ” എന്ന് പറയും.  

ഈ ’കർമ്മം’ അനുസരിച്ചാണ് ഓരോ  വ്യക്തിയുടേയും  ശരീര ഘടന, ജനനം, പ്രവർത്തനം, മരണ സാഹചര്യം  തുടങ്ങിയ കാര്യങ്ങളുടെ വിശദമായ    ‘കാർമിക്ക് ബ്ലൂ പ്രിൻ്റ്  തയ്യാറാവുന്നത്. ഇതിൽ മനുഷ്യ കുലത്തിൻ്റെ മൊത്തം പരിണാമത്തിൻ്റെയും, ഓരോ വ്യക്തിയും ജീവിക്കുന്ന അതാത് സമൂഹത്തിൻ്റെ  കൂട്ടായ പരിണാമത്തിൻ്റെയും    ഒക്കെ ഓർമ്മകൾ  ഉണ്ടാകും. കൂടാതെ ശരീരത്തിലെ  ഓരോ കോശങ്ങളുടേയും,  ആ കോശങ്ങളുടെ  നിർമ്മാണ ശിലകൾ ആയ ഓരോ  മൂലകങ്ങളുടെ നിർമ്മാണ രീതി, അവ ചേർന്ന് കോശങ്ങളും, കോശ സമൂഹങ്ങളും, ശരീര ഭാഗങ്ങളും ഉണ്ടാകുന്ന രീതികൾ, ആഹാരം ദഹിക്കുന്ന  രീതി, അവ ആഗിരണം ചെയ്യപ്പെടുന്ന രീതി എന്നിവയെല്ലാം ‘ഡാറ്റ’കളായി സംരക്ഷിക്കപ്പെട്ടു സൂക്ഷിച്ചിരിക്കുന്നു.  അതനുസരിച്ചാണ് ആ വ്യക്തിയുടെ ശരീരവും, ജീവിത സാഹചര്യങ്ങളും രൂപപ്പെടുന്നത്. മാത്രമല്ല,   ആ വ്യക്തി ഇതിന് മുൻപ് ജീവിച്ചിരുന്ന  സമയത്ത് അനുഭവിച്ച തീവ്രമായ വൈകാരിക  വിക്ഷോഭങ്ങൾ, ആ വ്യക്തിയുടെ  ദൈന്യം ദിന പ്രതിപ്രവത്തന രീതികൾ, പ്രവണതകൾ, ചായ്‌വുകൾ, തുടങ്ങി  വ്യക്തിപരമായ സർവ്വ  വിവരങ്ങളും  ഈ ഡാറ്റ സ്റ്റോറേജിൽ ഉണ്ടായിരിക്കും. ഈ ഓർമ്മകൾ എല്ലാം പരസ്പരം ബന്ധപ്പെട്ടാണ്  കിടക്കുന്നത്. കോടാനുകോടി മനുഷ്യർക്കിടയിൽ ഉള്ള ഭീമമായ  വൈവിദ്ധ്യത്തിന് കാരണം ഈ കാർമിക്  ബ്ലൂ പ്രിൻറ്റുകൾ ആണ്. 

ഓരോ ജനനത്തിലും ഒരു വ്യക്തിക്ക് ആ  ജന്മത്തിൽ കൈകാര്യം ചെയ്യുവാൻ കഴിയുന്ന അത്ര കാർമിക് ഡാറ്റകൾ മാത്രമാണ്  നൽകപ്പെടുന്നത്.   അങ്ങനെ ഏൽപ്പിച്ചു  നൽകപ്പെട്ടിരിക്കുന്ന  കാർമ്മിക് ഉത്തരവാദിത്തങ്ങൾക്കാണ് “പ്രാരാബ്ധ” കർമ്മം എന്ന് പറയുന്നത് എന്ന് നമ്മൾ  കണ്ടു.  ആ വ്യക്തിയുടെ ജീവിതാനുഭവങ്ങൾ  അപ്രകാരം ഏൽപ്പിച്ചു ലഭിച്ച  പ്രാരാബ്ധ കർമ്മം അനുസരിച്ചായിരിക്കും. ആ കർമ്മ ബന്ധനങ്ങൾ ഒരു ജീവിതത്തിൽ  അനുഭവിക്കുമ്പോൾ,  അതിൻ്റെ പരിണത ഫലമായി ഉണ്ടാകുന്ന  മാനസിക വിക്ഷോഭങ്ങളിലൂടെ  കൂടുതൽ കർമ്മബന്ധനങ്ങളുടെ ഡാറ്റകൾ   എഴുതി ചേർക്കുകയാണ് ചെയ്യുന്നത്.  

ഒരു ജന്മത്തിൽ (ഒരു അന്നമയ ശരീരത്തിൽ)  നിൽക്കുമ്പോൾ  കൈകാര്യം ചെയ്യുവാൻ കഴിയുന്ന ഡാറ്റ  മാത്രമേ നൽകപ്പെടുകയുള്ളൂ എന്ന് പറഞ്ഞുവല്ലോ.   ഇനിയും നല്കപ്പെടാതെ  ഡാറ്റ സ്റ്റോറേജിൽ ശേഖരിക്കപ്പെട്ടിരിക്കുന്ന കാർമ്മിക് ഡാറ്റകൾ വേറേ  ഉണ്ട്. അതാണ്  “സഞ്ചിത കർമ്മം” എന്ന് പറയുന്നത് എന്ന് നമ്മൾ കണ്ടു കഴിഞ്ഞു.  നേരത്തെ പറഞ്ഞ യൂണിവേഴ്സിറ്റി കോഴ്സ് എന്ന ഉദാഹരണത്തിൽ പ്രാരാബ്ധ കർമ്മം എന്നത് കോഴ്സ് സിലബസ്സിന് തുല്യമാണ്. “സഞ്ചിത കർമ്മം” പഠനം പൂർത്തിയാക്കുവാൻ ആവശ്യമായ അടുത്ത കോഴ്‌സുകൾ ആണ്. 
റുപേർട്ട്  ഷെൽഡ്രേക് ഒരു ബ്രിട്ടീഷ് ബയോളജിസ്റ്റ് ആണ്. അദ്ദേഹം  ജീവ ജാലങ്ങളിൽ   ഏതു കോശം ഏത്  ആകൃതിയും പ്രകൃതിയും ഉള്ള ഏത് ശരീരഭാഗം ആകണം എന്നുതുടങ്ങിയുള്ള വിവരം ആ കോശത്തിന് ലഭിക്കുന്നത് അതിൻ്റെ ചുറ്റുമുള്ള “മോർഫിക് ഫീൽഡ്” എന്ന ഒരു “ഫീൽഡിൽ” നിന്നും ആണ് എന്ന് ശാസ്ത്രീയമായി സ്ഥാപിച്ചിട്ടുണ്ട്. അദൃശ്യമായ മനോന്മയ ശരീരത്തിന് സമമായ സ്വാധീന മണ്ഡലങ്ങൾ ജീവജാലങ്ങൾക്ക് ഉണ്ട്. അതിനെ  ആണ്  ഷെൽഡ്രെക്ക് “മോർഫിക് ഫീൽഡ്” എന്ന് വിളിച്ചത്. അത് പോലെ തന്നെ മനോന്മയ ശരീരത്തിലെ സർവ്വ പ്രവർത്തനങ്ങൾക്കും ചിന്തകളുടേയും  വികാരങ്ങളുടേയും  വരവിനും പോക്കിനും എല്ലാം ഡാറ്റാകൾ ആവശ്യമുണ്ട്. അതും ശരീരമാസകലം വ്യാപിച്ചുകിടക്കുന്ന മനോന്മയ ശരീരത്തിൽ തന്നെ ആണ് നിലകൊള്ളുന്നത്. അദൃശ്യമായ ഈ ശരീരങ്ങൾ എല്ലാം ഓരോരോ വിവിധ തീക്ഷ്ണതകളിൽ ഉള്ള “ഫോഴ്സ് ഫീൽഡുകൾ” ആണ്. കാന്ത ശക്തി, ഗുരുത്വാകർഷണ  ശക്തി  എന്നിവയെപ്പോലെ ഉള്ള ശക്തിയുടെ മണ്ഡലങ്ങൾ ആണവ.